Z`Hansrüedi biographie nius miini lieder üftritta repertoir zeedees bschtellig links ambrichaladu i-meil heim

Z`Hansrüedi`sch News Mittwoch, 02. Juli 2008 Eidgenössisch Jodlerfäscht Luzääru   Hä scho eewig lang kei Nius meh gschribu... Aber ds Eidgenössisch Jodlerfäscht ischt eiguntli vill meh als en "Nius"-Itrag wäärt! Mit esooo vill Lit heint appa öi die allergreegschtu Optimischtu ds Luzääru nicht chennu rächnu. Äs het so vill Publikum käh, dass d'Jodler, Alphorublääser und öi wier Fahnuschwinger fascht unnergangu sind. Trotzdem: Äs ischt uhammer schöön gsii und ds OK het trotz der Uberrumplig va dene ganzu Züschauer d'Situation jederzit immer im Griff kä! Chapeau!!! Ich gfrewwu mich scho uf ds Weschtschwizer Jodlerfäscht ds Natersch z'neegscht Jahr!   Mittwoch, 02. Mai 2007 Zeedeetöififäscht   Wier hei sus gschafft!! Ds Zeedeetöififäscht ischt verbii!! Und jetz chunnt eppis wa bis jetz no (fascht) niemer weiss: Ds Zeedeetöifäscht "fAbisZät" isch ds'letscht Zeedeetöififäscht gsii. So eppis machi nie meh. Nit das appa nit güet wääri gsii - im Gäguteil: Aber mu sellti immer uf dum Höhepunkt üfheeru... Mier hets uhammer güet gfallu. Merci allne zämu wa derbii sind gsii und mich unnerstitzt heint. Sigs mit Schaffu, mit Mitsingu, mittriichu oder eifach mim Daasii. Vergältsgottvilltüüsigmal!   Freitag, 23. März 2007 Z’Hansrüedi’sch Zeedeetöififäscht ’07   Jetz häni miini Z'Hansrüedi-Nius es schutzji wirkli vernachlässigt. Aber darfer geits jetzu Schlag uf Schlag witer!! Ds Zeedeetöififäscht ischt meh oder weniger fertig organisiert - äs fählunt numma no es paar Chleinigkeite - aber de bringe wier öi no zwäg. Wier hei ds Programm vam Samstag-Namittag es bizji chennu umändru - so dass wier jetz no eppis meh Patz hei. Äs chennunt also no fufzig (50) Lit meh mitcho!! Amäldu cha mu schich mit dum PDF-Formular wa mu cha üsdricku und mier zruggschicku. Hier kannst Du das Programm Z’Hansrüedi’sch Zeedeetöififäscht ’07 als PDF herunterladen   Dienstag, 20. März 2007 ...im Hoch!!   Zer Zit is wie verhäxt! Äs löift und löift und löift und ich weiss sälber nit genau warum... D'niww CD "fAbisZät" ischt iner Fasnachtszit fascht nonstop gluffu - jedes zweit Maschgi het "Lalalaftinomeh" gsungu und bi de Üftritta chämunt eso vill jungi Lit cho losu wie scho sit Jahrzähntu nimme. Eifach schön!! Hoffuntli geit das schee lang e so witer...   Samstag, 28. Oktober 2006 CD "fAbisZät"   Jetz bini scho en Wucha zrugg vam Schiff und bi immerno nit richtig erholte... Isch uhammer schöön gsii!! Merci allne zämu wa fer die Super-Stimmig ire Teil bigitreit heint! Ich hä no es Häiläit: Miini niww Zeedee "fAbisZät" ischt fertig! Gidruckt, giprässti und bireit zer üsliffrig. Am Mäntag (30. 10.) gähnt alli Zeedees uf die Poscht. Ich bi gschpannt wie das niww Wärch achunnt! Gfrewwu mich uf d'Reaktione!   Montag, 09. Oktober 2006 Der grösste Walliser-Hit   Ich hä en Riesu-Freid! z'letscht Wuchunänd het ds Schwizer Fernseh ja der greegschtusch Schwizer-Hit gsüecht und dr Polo Hofer het mit de "Alperose" gwunnu. Ds gliicha het hittu Ds Radio Rottu (rro) het hittu ds Gliicha gmacht und mit 41% het "13 Stärna" gwunnu!! Gat vor dum Michel Villa mit "Dr Tiful isch gschtorbu" und der Sina mit "Dr Sohn vam Pfarrer". Merci allne zämu wa mich bi der Abschtimmig so unnerstitzt heint!! ...und hie chamu die Zeedee mit dem greegschtu Walliser-Hit aller Zite bschtellu: "Miini Lieder"   Sonntag, 08. Oktober 2006 Z'Hansrüedi-Nius vam Oktober 2006   Dü chascht dier gar nit vorschtellu, wie mier in de letschtu paar Täg gwohlut het... Ich hettis nit gideicht, aber miini niww Zeedee ischt jetz definitiv fertig üfgnu und abgmixt. Äs fählunt numma no zwei drii ganz chleini Sache bim Kower und de chamu miis niwwscht Chind prässu, ipacku und mier la züecho! Ab dum 2. Novämber chamu de die Zeedee „fAbisZät“ chöifu. Ich sägu numma eppis: Vill meh Abwächslig in einer einzig Produktion ischt fascht nimme meglich! Da heint d’Kollegu va dr Bänd und vam Tonschtudio en süüberi Arbeit abglifrut. Die wa mich in letschter Zit irgendeswa leif keert heint, die kennunt villiichter scho ds eint oder anner niww Lied. Ich hä jedufalls en enz Freid, dass die Produktion so güet üssacho ischt! Äs git sogar es Zeedeetöififäscht! Allerdings ischt die Organisatio zimmli in d’Hose gangu. Im Novämber häni äxtra es Wuchunänd greserviert fer das Fäscht - aber mu het mier kei Biwilligung gigäh fer miine Wunschort und jetzu müessi halt alls umorganisieru. Ds neegscht Wuchunänd wani frii bi, ischt eerscht Ändi April und jetzu wird das Fäscht eifach genau de durchgfiert. Äs git wieder en Driitäger! Am Fritag es Bigriessigsfäscht ds Natersch, am Samstag gits en richtige Uberraschigstag und am Sunntag wird’s de urchig volkstümlich! Also unbedingt ds Datum reservieru! 27. / 28. / 29. April 2007! Öi wenn die Zeedee de nimme so nöi wird sii... Die Zeedee chamu scho jetzu bschtellu. Üsglifrut wirdsch diräkt Afangsch Novämber! Jetz zumene andru Thema: Uf dum Gäschtebüech va miiner Internetsitta sind länger je meh Wärbige und Links zu Potänzpille, Leifgäms oder sogar zu Pornositte üfgitöicht. Lüt miinum Profäider chamu gar nix dergägu machu - darum häni wohl oder ibul ds Gäschtebüech miessu abschtellu - äs het mi hert! Naaträglich müess ich mich no bi allne dene entschuldigu, wa miine Üftritt bim Open Air Gampel verpasst heint - ich häsus wirklich niemerum derfu sägu - äs ischt drum en Uberraschigsüftritt gsii. Äs ischt es bsunners Erläbnis gsii mit ere Punkrock-Bänd (A.F.) vor en paar tüüsig Lit eiguni (ganz lütti!!!) Lieder (...zwar es bizji abgändrut...) z’singu. So und jetzu gahni ga packu! Ds Schiff wartut! Bis bald emal...   Dienstag, 25. Juli 2006 Gäschtebüech und CD   Ich hä z'heiss!!!! In miinum chleinu Üfnahmestudio bi mier deheimu hets geschter am Maabu genau 48 Grad kä. Trotzdem bini witerhin fliissig am schaffu, dass die niww Produktion ganz sicher rächtzitig uf du Märt chunnt - zwischudri bini ja no am müsizieru... Jetz häni va miinum Gäschtebüech definitiv d'Nasa voll! Jede Tag fascht zwenzg Iträg wa Viagra, Potänzmittul oder suschter Pille wellunt verchöifu hän ich miessu leschu oder lah leschu. Üsserdem sind wirklich en paar ganz schlimmi Links uf Porno-Sitte drunner gsii. Ds Gäschtebüech wird ab sofort gschlossu! Lüt miinum Internet-Chef cha mu nix machu gägu sottigi Wärbig und Biläschtigunge. Derdussunt sige das güet konschtruierti Programmi wa das sälbschtschtändig wältwit chennunt verbreitu. En Riesu-Schwiinerii! Trotzdem wellti ich allne merci sägu wa miis Gäschtebüech gibrüücht und biriichrunt heint. Merci villmal!   Freitag, 30. Juni 2006 Jodlerfäscht und CD   D'Jodlerfäscht sind jetz alli durch und ich hä agfangu mit der Produktion va dr niww CD. Ich gfrewwu mich scho uf ds isingu - aber das geit appa no es schutzji. Sobald dasi d'eerschtu Lieder igschpillt hä, mäldi mi de wieder....   Dienstag, 06. Juni 2006 Fahnuschwingu   Mu merkt dasi nimme soo vill am Kompjuter hocku... Hä scho eewigs lang nix meh in die Nius gschribu. Äs git eiguntli öi nix bsunners d'schriibu - numma dasi zer Zit fascht nummu fer ds Fahnuschwingu unnerwägs bi. D'Wanderpriisa sind alli durch (ich bi mit mier einigermassu zfridu gsii: WSJV 1. Rang - EJV 10. Rang) und d'Jodlerfäschti stäähnt vor dr Poorta. Ich bi so wie immer an allne drii Fäschti voll derbii. Rächthaltu, Biel und Eisidlu wärdunt sicher uhammer schööni Jodlerfäschti - bsunners öi darum, will ich an keine va dene drii Veraschtaltige tüe Müsig machu - ich bi numma am fahnuschwingu. Villiichter gseh wier iisch ja an eine va dene Fäschti...   Dienstag, 29. November 2005 Z'Hansrüedi'sch Rottu-Flussfahrt   Genau jetzu sind no 5 Amäldige igangu! Das heisst: D's Schiff isch üsgibüecht!! Bivor dasi ds Schiff nit sälber bisichtigut hä, nimm ich kei Amäldige meh entgägu. Da aber erfahrigsgimäss immer wieder Abmäldige git, gits va jetzt awäg en Warteliischta. Das hetti nie gideicht, dasmu scho im Novämber vam Vorjahr en Flussfahrt wa im Oktober stattfindut, cha üsgibüechte sii! Merci villmal fer die eimalig Unnerstitzig!!   Samstag, 29. Oktober 2005 Z'Hansrüedi-Nius-Brief va Ändi Oktober 2005   Säg sälbscht: Isch das jetz nit wieder mal en uverschämte Oktober gsii? Ich bi halt eine va de ganz wenigu Schwizer wa dr Herbscht am liebschtu het! Die herrlichu Farbe, die frischi Luft, äs düücht eim mu chenne dene ganzu Tschugge fasch acho – eso nooch gseht mu schi... Allerdings gseht’s iner Üsserschwiz es bizji annersch üs – aber der Näbul chunnt ja bikanntlich nit bis zu iisch ins Wallis!! Apropo Oktober: Äs heint schich scho uner ninzg Persone fer d’Schiffahrt vam neegschtu Oktober agmäldut! Merci vill villmal fer die uhammer Unnerstitzig! Wills appa numma fer hundertzwenzg Lit Platz het, müess ich also gar kei Wärbig meh fer die Rottu-Schiffahrt machu! Also gits öi kei Proschpäkti meh... Apropo Proschpäkti: Mier sind miini Üftrittsliischtu-Proschpäkti üsgangu. Also schicki dizmal miini Liischta es bizji annersch - tüet mier leid. D’Üftritta gseht mu ja gliich... Apropo Üftritta: Leider het mu mier der Üftritt im Ängul ds Fribourg abgseit – jetz gahni halt uf Wollerau ga schpilu – das git sicher öi es uhammer Fäscht! Öi in du Rhiifälderhof uf Basel gahni nimme ga schpilu, will der Fröhlicher nimme druf wirtut. Sinduschad!!! Darfer bliibunt aber alli annru Üftritta wa derdussunt zer Tradizio wordu sind: ds Winzerfäscht ds Döttigu, bim Rolf ds Saas-Almagäll, ds Rothrist im Scharfen Ecken, im Kronenhotel ds’Andermatt, bim Reto uf der Schönhalde in de Flumserbärga, bim Hene im Turm ds Thun, d’Wältcup-rennu ds Adulbodu und so witer! Ich bi wirklich froh, das mich d’Lit immer wieder anga-schierunt und ne miini Müsig nit verleidu tüet. Aber ohni es güets Publikum würdi das ganz sicher nit funktionieru! Apropo Publikum: Es Vergältsgottvilltüüsigmal allne Fröinda und Kollegu wa im Jahr ixhundert Kilometer under d’Reder nähmunt, fer mich bi miine Üftritta ds unnerschtitzu. Das tüet einum richtig güet! Öi wenn’s villiichter es bizji sentimental teent: Öi es tüüsigsfach Dankeschön miiner Karin. Ohni schii hetti appa das Alles nimme so im Griff! Apropo im Griff hä: Mich het länger je meh wieder d’Fasnacht im Griff!! Nei nei nei – fer d’Fasnacht is nie z’früeh! Wier va de „Üfheeru!!“ gfrewwe iisch scho jetz wie es chliis Jingi uf die Üftritta! Aber jetzu chunnt afa mal zeerscht d’Adväntszit, Wienächtu und ds niww Jahr. Ich bi diz Jahr appa der eerschtu wa dier es güets Niwws winscht – aber bis Ändi Jahr gits ganz sicher kei „Z’Hansrüedi-Nius“ meh! ... und darum scho jetzu: Heppinjujeer! Apropo: dascht jetz emal änglisch gsii...   Dienstag, 12. Juli 2005 Z'Hansrüedi-Nius-Brief vam Juli   „Z’Hansrüedi’sch Rottu-Flussfahrt“ Genau so heisst jetz d’Reis wani z’neegscht Jahr wieder darf organisieru. Alli wa an einer va de letschtu Schiffsreise derbii sind gsii, wissunt ja was da uf d’Lit züechunnt... Äs wird aber „mit einer an hundertprozentigen Sicherheit grenzenden Wahrscheinlichkeit“ miini letschti sälbscht durchgfierti Flussreis sii. Äs git ja derdussunt fascht kei europäisch Fluss meh, wa wer nit scho kenne... Will d’letschtu Reise e so sensationell güet gluffu sind, hänimi dizmal chennu durchringu die Reis ganz alleinzig – also ohni Mithilf vamene Reisebüro – durchzfieru. Als biliebte und versierte Reiseleiter chunnt öi dizmal der Bruno mit. Äs wäri natiirli uhammer schön, wenn das Schiff im Novämber scho meh oder weniger voll reserviert wääri - de brüüchti äbu kei züesätzlichi Proschpäkti meh z’dricku... Aber äs het so oder so nit vill vorige Platz uf dem Schiff – der wa schich z’eerscht amäldut – der ischt der eener... Sit de letschtu „Z’Hansrüedi-Nius“ im Märzu ischt in miinum Umfäld zimmli vill passiert: Näbu dum Fahnuschwingu – wa bim Jodlerfäscht ds Aarau eiguntli schiine Höhepunkt hett kä – und de „Üfheeru!!“ – wa wer ds Üftrittsprogramm fer ds neegscht Jahr scho feschtgleit hei (www.uefheeru.ch) – hetti ich eiguntli mit de Üfnahme zu miiner niww Zeedee wellu afah. Äs ischt alles giplaanut gsii – va de Müsiker, dum niwwu Kompjuter, dr Studiomieti bis zum Abmischu in de Hardstudios ds Winterthur. D’niwwu Lieder sind teilwiis öi scho bireit oder wenigschtens z’fadugschlagu gsii und de häni schlussändli doch mit ganz schwäärum Härzu die ganz Prozedur miessu abbrächu und sus uf ds neegscht Jahr verschiebu. Us einum eifachu Grund: Ich hä zer Zit suschter scho gnüeg um d’Ohre und weni eppis machu, will ich sus mit vollum Härzu und mit Vollgas machu und kei halbpatzigi Sache. Ich gfrewwu mich scho uf d’Üfnahme und verschprächu scho jetzu, dass das en uhammer güeti Produktion git - aber äbu eerscht ds neegscht Jahr. Fer dizmal häni gnüeg gschribu und äs nimmt mi währli wunder, wievill Amäldige fer d’Schiffahrt in neegschter Zit in miinum Briefchaschtu landunt... Hoffuntli gseh wier iisch bald bi einum va miine Üftritta - oder de äbu uf der „Z’Hansrüedi’sch Rottu-Flussfahrt“.   Mittwoch, 29. Juni 2005 Z'Hansrüedi'sch Rottuflussfahrt   Ds Programm steit!! Mu cha schich scho amäldu! Am Beschtu gat diräkt bi mier sälber. Ich gfrewwu mich druf! Und hie no witeri Informatione: Dr Rottu durchfliesst uf schiiner Gsamtlängi va achthundertdrizäh Kilometer zeerscht afa mal dr allerschönschtusch Fläcku va dr ganz Wält und bivor das är de ds Wallis wieder verlaht, leest är schich meh oder weniger im Gänfersee üf und fliesst dernaa durch ds Franzoosuland bis är de ds Mittulmeer mit dum Wasser va de Walliser Gletscher biriichru tüet. Iische Walliser-Rottu cha mu aber nimme mit dem Fluss ds Frankriich vergliichu, wa da jetzu pletzli komischerwiis „Rhône“ heissut und durch d’schönschti Gägund va de Franzoosu rinnu tüet. Am Beschtu chunnsch dr Rottu da unnina gat sälber cho bschouwwu! Programm 1. Tag: Sonntag, 15. Oktober 2006 Busfahrt in Richtung Genfersee Lausanne – Genf – Lyon. Im späteren Nachmittag Einschiffung auf Ihr Hotelschiff, MS „Camargue“. Kabinenbezug, Abendessen, Begrüssungsapéro und Unterhaltung durch Z’Hansrüedi. Das Schiff verlässt Lyon. 2. Tag: Montag, 16. Oktober 2006 Frühstücksbuffet. Geniessen Sie die Annehmlichkeiten des Schiffes. Morgenplausch mit Z’Hansrüedi. Fahrt Richtung Süden nach Avignon. Nach dem Mittagessen Ankunft und Möglichkeit zu einem fakultativen Ausflug „Camargue“. Das Schiff fährt weiter nach Arles. Abends, fakultativer geführter Spaziergang durch Arles 3. Tag: Dienstag, 17. Oktober 2006 Frühstücksbuffet. Von Arles führt die Reise in den frühen Morgenstunden zurück nach Avignon. Möglichkeit zu einem fakultativen Ausflug „Pont du Gard, Papstpalast“. Gegen Mittag verlässt das Schiff Avignon in Richtung Viviers. Am Nachmittag geniessen Sie einfach die Landschaft, die an Ihnen vorbeizieht. Abendplausch mit Z’Hansrüedi. 4. Tag: Mittwoch, 18. Oktober 2006 Frühstücksbuffet. Am Morgen Möglichkeit zu einem fakultativen Ausflug in die Ardèche. Das Schiff fährt in der Zwischenzeit nach La Voulte. Hier steigen die Teilnehmer des fakultativen Ausflugs wieder zu. Mittagessen. Die Reise führt Sie weiter nach Tain L’Hermitage, einem wunderschönen, unter Weinbergen gelegenen Ort. Abschiedskonzert mit Z’Hansrüedi. 5. Tag: Donnerstag, 19. Oktober 2006 Frühstücksbuffet. Ankunft in Lyon. Ausschiffung und Rückreise an die Einsteigeorte. Preis pro Person Kategorie A / Doppelkabine zur Alleinbenützung, Oberdeck Fr. 1'495.-- Kategorie B / Doppelkabine zur Alleinbenützung, Hauptdeck Fr. 1'295.-- Kategorie C / Doppelkabine, Oberdeck Fr. 1'195.-- Kategorie D / Doppelkapine, Hauptdeck Fr. 995.-- Kategorie E / Dreibettkabine Hauptdeck Fr. 995.-- Hafentaxen Fr. 70.-- Auftragspauschale Fr. 50.-- Annullationskostenversicherung Fr. 30.-- Zuschlag 3. Person Kategorie E, Erwachsene Fr. 600.-- Zuschlag 3. Person Kategorie E, Kinder Fr. 350.-- Im Preis eingeschlossen sind Busfahrt nach Lyon und zurück an die Einsteigeorte in der Schweiz Begrüssungsapéro Flussfahrt in der ausgewählten Kabine Frühstücksbuffet, Mittagessen, Abendessen, Gebäck/Kaffee am Nachmittag Begrüssung an der Bar mit Unterhaltung am 1. Tag Morgenplausch mit Z’Hansrüedi am 2. Tag Abendplausch am 3. Tag Abschiedskonzert am 4. Tag Captains-Dinner/Abschiedsessen Unterhaltung durch den Bordmusiker Betreuung durch Z’Hansrüedi Reiseleitung durch Bruno Im Preis nicht eingeschlossen sind Getränke und sonstige Extras der Teilnehmer Nicht aufgeführte Mahlzeiten Fakultative Ausflüge   Montag, 20. Juni 2005 Eidg. Jodlerfest Aarau   Ds Fäscht isch durch! Mit de Resultati va miine Kollegu und mier cha mu meh als zfridu sii! Niemer im Driiji va de Walliser Fahnuschwinger! Ds Duett mim Fredy zämu isch zwar es bizji abverreckt, aber fer es güets Zweiji hets no lang glängt. In miinim Einzul is mer sau güet gluffu und dank dum Umzug vam Sunntag häni immer no Muskulkater. Ich gfrewwu mich scho uf d'neegschtu Jodlerfäschti ds neegscht Jahr!   Freitag, 15. April 2005 Z'Hansrüedi-Nius   Merci Blatti!!! Va jetz awäg gits immer d'aktuellschtu Z'Hansrüedi-Nius öi uf der Houmpeitsch zum Nahläsu! Ds Blatti (der va de CB-Design) het alles eso üfgschaltu wies müess sii. Vill Vergniegu bim Sörfu uf miiner Sitta.   Dienstag, 12. April 2005 MP3-Songs!!   Va jetz awäg chamu en paar Songs va mier probelosu!! Eifach unner "Miini Lieder" gah und bi dem Song wa mu will keeru "losu" atippu.   Montag, 11. April 2005 Schiffahrt 2006   Jetz is definitiv üs: Vam 15. Oktober - 20. Oktober 2006 geits wieder uf ds Schiff! Dizmal uf du Rottu! Mu cha schich übrigens scho (inoffiziell) amäldu. Am Beschtu gat diräkt bi mier. Ich gfrewwu mich scho uf die Reis!!   Dienstag, 29. März 2005 Z'Hansrüedi-Nius-Brief vam März 2005   Wenn mich nit epper aglah hetti, ob är die Z’Hansrüedi-Nius eiguntli nimme verchunnt, hetti appa gar nit gmerkt, dass dischi Ziile scho lang naa wääri gsii. D’Zit geit scho afa gottlos schnäll verbii. Aber jetzu äbu zu de Nius: D’Fasnacht diz Jahr ischt fer mich appa eine va de schönschtu Fasnachtu gsii. Wier si mit dr Schnitzulbankgruppa „Üfheeru!!“ uhammer flissig unnerwägs gsii. Äs het gfätzt wie sältu. Nit z’letscht öi wägum miinum Vater wa das Gwaaltsprogramm trotz schiine achtusibzg Jährli eifach so mit lings gmeischtrut het... Schappoo!! No vor der Fasnacht, ds letscht Jahr im Novämber, häni die Töifi va dr Zeedee „Nennt mir das Land...Vol.2“ z’Natersch derfu fiiru. Dr Jonas het en supermegagiga schöne Aabu organisiert und gleitut! Aber öi d’neegscht Zeedeetöifi bim Rolf ds Almagäll hets in schich kä. Ich hä im Mattmarkblick der Läbtaglang no nie e soo lang derfu spilu. Nomal es Vergältsgottvilltüüsigmal dum Jonas und dum Rolf fer die uhammer Unnerstitzig!! Die wa die Zeedees no nit heint: Mu cha schi immer no bschtellu.... Jetz nah der Fasnacht hänis müsikalisch es bizji sus chennu gmietlicher nä. Aber äs ischt bi mier deheimu öi ohni Müsig es bizji druber und drunner gangu...das gits halt... In neegschter Zit - näbu dene ganzu Üftritta - geits de so richtig los mit de Vorarbeite zu miiner längscht fälligu niwwu Zeedee mit eigunde Lieder. Ich gfrewwu mich scho uf ds Komponieru, ds Tegschtu, ds Üfnäh und uf die Zämuarbeit mit dene verschiedune Walliser-Gruppe wa bi der Produktion wärdunt mitmachu. Wie die Zeedee wird heissu weissi scho...Lät che la uberraschu. Ich glöibu zwar nit, dass fer diz Jahr no längt schi fertigzmachu. Üsserdem häni no en niwwi Üfgab als Redakter va dr Zitschrift „Alpenrosen“ (fer d’Fahnuschwinger) ubernu. Züedem steit ds Eidg. Jodlerfäscht Aarau vor dr Porta. Längwiilig wird’s mier sicher nit... Ich gfrewwu mich scho uf d’neegschtu Üftritta! Villiichter bischt ja öi emal derbii - ich hetti en enz Freid!   Samstag, 26. Februar 2005 Zbindini Die Erste & Zbindini Die Zweite   Numma ganz churz: Die zwei Kassette gits ab sofort nimme - üsverchöift...   Freitag, 28. Januar 2005 Üfheeru!!-Date   Die genaue Üftrittsdate va iischer Schnitzulbankgruppa "Üfheeru!!" chascht jetzu nahläsu im Internet: www.uefheeru.ch   Freitag, 31. Dezember 2004 Güets Nöis   Allne zämu wani kennu...   Freitag, 03. Dezember 2004 CD-Taufe im Mattmarkblick   Jetz chani d'Chatz us dum Sack lah: Äs git diz Jahr no en Zeedeetöifi meh: Am 22. Dezämber in Saas-Almagäll im Hotel Mattmarkblick bim Rolf töif ich miini allereerscht "Live-CD". Genau bim 20jährigu Jubiläum vam Rolf und mier im Mattmarkblick...   Donnerstag, 28. Oktober 2004 Z'Hansrüedi-Nius vam Oktober '04   Joohoolüjooo joooholüjoooo! Ich keeru der ganz speziell Jodul immer no in miine Ohrini! Uf der Rhii- Schiffahrt hei wier das Liedji mit dem igängigu Jodul fascht Tag und Nacht gsungu. En uhammer Stimmig isch gsii und... mu het mich scho wieder mägu uberschnuru nomal so en ganz spezielli Schiffsreis z’organisieru... Im Oktober 2006 geits de uf du Rottu (nit im Wallis – ds Frankriich!). De cha de dr Ledl nit numma „schiine“ Jodul, sondern öi schiini ganz speziell „Marseijees“ singu! Wenn de die Zerzuben-Touristik und ich meh wisse, gäbe wier de gat sofort Bscheid. Ich bi aber sicher, dass öi dizmal de ds Schiff wieder üsgibüecht wird sii! Jetz aber ds Wichtigschta: Miini niww Zeedee „Nennt mir das Land... Vol.2“ ischt fertig und scho im Verchöif! Äs ischt en ganz spezielli Produktion mit ganz spezielle Lieder wordu! Ganz alti Walliser Schlager wa mu derdussunt fascht vergässu het oder wa hitzutagsch fascht niemer meh kennt, häni es bizji agipasst und niww igsungu. Wan ich die Zeedee zeerscht mal dum Töifgetti va dr Zeedee „Natersch“ (Jonas Zenhäusern) bimene sehr denkwürdigu Üsflug uf Saas-Fee in schiinum Auto vorgschpillt hä, het der nit chennu bigriiffu, dass ich dischi niww Produktion nit will töifu. Will eiguntli häni ja wellu wartu, bis ich en Produktion mit eigunde Lieder üssagibu, aber der Jonas het mich doch chennu uberschnuru und organisiert va schich üs (ohni miini Mithilf!) en Zeedeetöifi am 19. Novämber im Saal zer Linda in Natersch. D’einzig Üfgab va mier ischt en Fläijer z’machu und der bi de neegschtu „Z’Hansrüedi-Nius“ zverschicku. Häni dadermit gmacht. Merci Jonas fer diini Arbeit – und ich gfrewwu mich uf das Fäscht genauso wie ganz villi andri Lit öi! Hoffuntli isch der Saal am Ninzähntu steckuvolle!! Dü gseehscht: In neegschter Zit löift eppis! Aber äs längt no nit: Am 22. Dezämber spill ich im Mattmarkblick ds Saas-Almagäll bimene ganz speziellu Üftritt! Ds Christine und der Rolf sind jetzu scho sit 20 Jahr uf dem Hotel druf und ich spilu öi scho sit zwenzg Jahr bi ine. Also machi da innina en ganz spezielle Üftritt, bimene ganz speziellu Alass und ener ganz speziellu Prömjeer (Uberraschig!!). Der Rolf het wägu dem öi es ganz speziells Jubiläumsagibot gmacht mit ganz speziellu Priisa und gfrewwt schich ganz speziell uf alli Gäscht wa das Agibot tient üsnitzu und vier Täg bi ihm bliibunt. Numma no en chleini Bimerkig zu dem Fäscht: Ab dum 22.12.04 chascht mich de deheimu öi „Live“ losu... (Schtigsch??) So das wäris eiguntli scho wieder gsii. Ich winschu allne dene wani in neegschter Zit nit gseh scho hittu schööni Fäschttäg, en uhammer luschtige Rutsch ins niww Jahr und en wunderschööni Fasnachtszit. In der Faschtuzit häni de wieder Zit en niwwe Brief z’schriibu.   Donnerstag, 23. September 2004 CD-Taufe "Nennt mir das Land....Vol.2"   Geschter im Üsgang mit dum Jonas (Töifgetti va dr Zeedee "Natersch") häni mi doch chennu uberschnurru en Zeedee-Töifi fer miini niww Zeedee lah dsorganisieru... Ich müess dum ganzu Fäscht nix nahfräägu. Dr Jonas will alles zämu organisieru. Am 19. Novämber 2004 im Saal zur Linde! Ich gfrewwu mich schoi druf!!!!!